ensera tekura abis akal

CHUNTO BROSUR DALAM JAKU IBAN

SEMPAMA JAKU IBAN

	2014
	Institut Pematih Pengajar Kampus Rajang, 96509 Bintangor, Sarawak.

SEMPAMA JAKU IBAN

“Mang ari kepayang rendam sepagi, munuh ari ipuh ujung jenggi, nyaing ari puting mata geraji”

PENGELALA PASAL SEMPAMA

Jaku sempama ba kitai bansa Iban endang iya besai amat guna laban iya mai serangkap rampa reti ti besai sereta dalam. Iya mungkur leka jaku kelaung jaku silup, jaku tapis enggau jaku tetak. Sempama tu kekadang mai semina siti leka jaku, dua leka jaku, tiga leka jaku tauka mayuh agi ari nya.

Sempama ti ngena seleka leka jaku iya nya baka tabin, layu, meruap, chelap, sarat, enggau ke bukai.

Sempama ti bediri ngena dua leka jaku aja baka buah lemba, betubuh bisi, achuk rangkang, urat kayu enggau ke bukai.

Sempama ti ngundan tiga leka jaku ti seruran dikena kitai mega baka angat tai manuk, makai buah emperingat, buah tamang raja enggau ti bukai.

Sempama ti ngena lebih ari tiga leka jaku sereta bisi berambai munyi ba ujung ayat baka ti di baruh tu:

Lindung tuga lindung batang.

Di lubuk ngauk di rantau nyengkau

Untung sekarung rugi seguni.

Mansai sungai ngena tapa,

nebang tapang ngena lungga.

Hari bebini hari betutus, tutus gerai bini mati.

Ngarapka pagar, pagar makai umai.

 Orang Engkari ngumbai diri nadai besi, dinga besehari-sehari ngambuh duku,

Orang Julau madahka diri nadai semakau, peda bekeliau api ruku.

 Nyadi bansa kitai Iban besempama dikena ngayanka penalam sereta pemesai basa ngagai pangan diri, temuai pia mega sebarang orang bukai. Sempama tu nyadika chura baju kitai siku-siku laban kenyau ari kitai nemu bejaku dia kitai endang diajar apai indai niti adat basa. Sempama mega dikena ngemanis tauka ngelangkungka pekara ti dikejakuka. Kelimpah ari nya iya mega dikena nyilupka penemu ti kasar ngambika enda tak kelalu kasar didinga. Ngarapka utai tu meruan dikena nambahka penemu pasal pengaya jaku Iban ba kitai mayuh sereta tau nyadika teladan pengidup semua. Nya alai nangkanka tu deka dirintaika sekeda sempama ti semampai bisi dikena sereta selalu bisi kaul enggau pengidup kitai besehari-hari.

BAGI 1

NO.	SEMPAMA	RETI	AYAT CHUNTO
1	Ikak lelanggak ikan enda ngaban, kudi memuri hari enda ujan.	Ngembuan pengingin ati ngagai orang tang orang nya enggaika iya.	Igat lama endar udah ingin ke Yak tang iya tak semina ikak lelanggak ikan enda ngaban, kudi memuri hari enda ujan laban Yak endang nadai ati ke iya.
2	Ngarapka kijang dalam babas.	Ngarapka utai ke bedau temu ulih tauka enda.	Kitai anang ngarapka kijang dalam babas aja enti kitai enda nurun ngiga utai nadai tau datai kediri ke rumah.
3	Rusa di kaki tangga enda diemparu, kunchit di tisi langit deka ditunu.	Utai ke semak udah temu ulih enda diambi tang utai ke jauh sereta bedau temu ulih tauka enda deka digiga.	Balat ga Jang, rusa di kaki tangga enda diemparu, kunchit di kaki langit ka ditunu rindu pegi ke Brunie ngiga pengawa laban di menua diri pan mayuh endur bekuli.
4	Pandak mulut engkerasak, panjai mulut kitai.	Orang ke deka bendar betenah tauka bejai orang bukai.	Pama bendar mulut Indai Sanu nya, pandak mulut engkerasak panjai mulut kitai enti iya udah nusui utai.
5	Baka pipit ke deka nelan buah embawang.	Baka orang ke deka ngereja pengawa ke enda ulih ditapi tauka ditangkup iya.	Dom baka pipit ke deka nelan leka embawang deka nangkup pengawa ke ngemesai nya tang iya nadai penemu enggau pengelandik ba pengawa nya.
6	Untung bulih beliung enda ngambuh, mudah bulih peredah enda ningkuh.	Bulih utai tang nadai pengiruh tauka pemedis ngulihka iya. Bulih utai enggau mudah.	Sabit untung bulih beliung enda ngambuh, mudah bulih peredah enda ningkuh lebuh ke jadi enggau Idut laban Idut udah bisi anak dulu dua iku.
7	Baka langkau enda ngipakka dampa, baka lalau enda ngipakka tangga.	Pengawa ke dikereja enda ngipakka langkar tubuh.	Pemanah pengawa ke dikereja Apai Salun baka langkau enda ngipakka dampa, baka lalau enda ngipakka tangga enti disbanding enggau penegap langkar tubuh iya.
8	Anang guai manjung di pala wung.	Anang guai gaga enti utai ke dikereja tauka dikinginka bedau temu ulih.	Lebuh ngereja pengawa kitai anang beguai manjung di pala wung enti utai nya bedau temu ulih digaga kitai.
9	Nibarka jala enda betating.	Mansutka jaku enda berunding dulu.	Lebuh sida serumah baum, Pachal suah bender nibarka jala enda betating lebuh ke mansutka jaku.
10	Ngasaka nyawa langau.	Ngasaka diri aja, ngumbai indu dara deka ke iya.	Ujang semina ngasaka nyawa langau melanja indu dara makai ngirup tang iya enda nemu diri ditipu orang.
11	Baka buyah ke nabak diri ke api.	Ngereja pengawa ke ngemedis diri.	Sagup baka buyah ke nabak diri ke api lebuh iya nguji ngerara orang ke benung balaya laban iya empu kena palu orang.
12	Sapa ke makai chabi nya meh berasai pedas.	Orang ke ngereja penyalah nya meh ngasaika penyalah diri.	Chakoh enda bemunyi lebuh pengajar nanyaka sapa bagi sida sekelas ke selalu inggar laban iya nemu sapa ke makai chabi nya meh berasai pedas.
13	Orang di ili ngusi tubu, orang di ulu balut miang.	Orang rumah bukai ke bisi penusah tang kitai serumah ke enggau kiruh.	Dalam kandang setaun tu kami empat buah rumah ke semakai suah bendar dituntung penusah, orang di ili munsi tubu orang di ulu balut miang.
14	Ragak riang, enti dipansuh enda bulih seputung munti.	Balat seregah tang penemu ke dikembuan enda tetipakka seregah.	Igat suah disebut orang ragak riang enti dipansuh enda bulih seputung munti laban pama endar seregah iya tang penemu enngi iya agi kurang.
15	Labang apai labang anak.	Enti apai indai enda manah ulah, anak pan murihka penyai apai iya.	Apai Supui seduai anak iya selalu disebut orang labang apai labang anak laban seduai sama enda manah jari.
16	Baka kepayang ngadaka dilah.	Nyebut aja tang enda ngereja.	Lebuh ngereja pengawa bebala mayuh kitai anang semina baka kepayang ngadaka dilah tang kitai mesti sama-sama ngereja iya.
17	Besai periuk besai ga kerak, besai beliung besai ga abak.	Orang ke begaji besai mayuh ga belanja iya.	Sudit begaji besai lalu mayuh utai ke berega mar ulih beli laban iya disemaka besai periuk besai kerak, besai beliung besai ga abak.
18	Lawa kerubung enda perisi.	Balat seregah tang kurang penemu tauka belanja dikembuan.	Awat nya lawa kerubung enda perisi, gari dikena amat manah tang kuchik iya puang.
19	Bisi niki nibung, bisi niki pinang.	Bechiping adat.	Orang ke nyadi tuai anang bisi niki nibung bisi niki pinang lebuh mutuska pehcara ke diatur sida.
20	Duruk bubut enggau ruai.	Beduruk tauka ngereja pengawa ke enda setipak enggau enggi pangan diri.	Lebuh ke beduruk ngetau ngagai sida apai Simpi kemari dia deh apai Umang nyata bendar baka duruk bubut enggau ruai laban iya enda bebendar baka iya ke ngetau umai diri empu.
21	Bubut tau ruai enda.	Dua iku orang ngereja pengawa ke bebida pemanah.	Kami serumah enda tentu lantang ati ngagai apai Bubui ke nyaga utai kunsi kami serumah laban bubut tau ruai enda lebuh deka ngena utai nya.
22	Mansai sungai ngena tapa, nebang tapang ngena lungga.	Deka ngereja pengawa ke temu enda ulih tangkup.	Pengawa ke deka diaduka kami serumah mar sereta tusah tang kami nguji mansai sungai ngena tapa, nebang tapang ngena lungga.
23	Remaung di rumah, raung di tanah.	Di rumah kering, regas tang enti gawa di tanah nadai tapi.	Igat Rungak nya remaung di rumah raung di tanah, tubuh aja besai tang nadai tapi.
24	Batu tungku pan tau besengki.	Diri menyadi pan tau belaya.	Amat pan kitai sekaban nadai kala belaya enggau pangan ngelamatu tang taja pia batu tunggu pan tau meh besengki.
25	Baka pitak ke dibuai mata.	Nadai temu tunga, nadai temu tuju.	Udah Suat ke dianu indai iya dia baka pitak ke dibuai mata nyau selalat ringat ke ruai ke bilik.
26	Baka ukui deka beranak. Baka ukui labuh anak.	Kasak-kasak, enda jenuh pendiau.	Laban ke keran deka meda pemajik gamal anak dara temuai ke baru datai dia Igat nyau baka ukui ke deka beranak pansut tama ke ruai ke bilik serta nilik ari penjan.
27	Baka mayau enggau ukui.	Enda tau begulai, selalu belaya.	Andau seduai Marin seruran baka mayau enggau ukui selalu deka bekerantam enggau pangan diri.
28	Baka keli ditetak iku.	Enda entap burit, selalu kundang kuit bejalai kin kitu.	Endun suah disindir indai iya baka keli ke ditetak iku meda iya enda entap diau ba bilik diri.
29	Lansar tau nyadi lubuk, lubuk tau nyadi lansar.	Orang ke mensekin sereta tusah pendiau tau nyadi kaya sereta lantang lalu orang ke udah kaya sereta nyamai diau tau nyadi mensekin papa.	Sida Agum sebilik ukai main pengaya sereta sumbung agi iya benung gawa perintah suba tang diatu lansar tau nyadi lubuk, lubuk tau nyadi lansar lalu pengidup sida semakin merinsa.
30	Manuk lepas jari bau tai.	Udah bulih peluang enda dikena, udah peluang nya lepas baru nesal.	Ajin ngaga diri enggai lebuh dibai indu dara betemu kemari laban iya enggai enda saritu tang diatu manuk udah lepas jari bau tai laban indu enggai agi betemu enggau iya.
31	Baka timau jampat medah.	Enda liat ngereja pengawa, jampat leju.	Akat ukai main pengerajin lebuh berengkah ngepunka semua pengawa tang iya baka timau jampat medah, enda teapuska pengawa iya lalu matak diri.
32	Bekikis bulu betis bebuai bulu gundai.	Beambis belanja enggau reta tengkira dikena nyengulaka bala anak.	Kami duai melaki bini bekikis bulu betis bebuai bulu gundai empa pemendar nyengulaka bala anak.
33	Baka perau ke patah kemudi.	Pengawa ke dikereja nadai pemujur laban nadai orang ke nemu ulih ngiring kitai.	Sekumbang apai kami ke udah mati dia kami menyadi baka perau ke patah kemudi lebuh ngereja pengawa ke berat sereta tusah laban kami bela agi mit.
34	Baka mumban ke teruju ai.	Baka pendiau ke enda tentu tegap tang enda ga tak kelalu merinsa.	Pendiau sida Chawit sebilik indah enda baka mumban ke duju ai laban sida sampal enda tentu rajin gawa.
35	Untung sekarung rugi seguni.	Amu deka bulih untung mayuh tang tulihka pengerugi.	Apai Ipa untung sekarung rugi seguni lebuh nyual lada tadi laban minggu nyin kemari lada agi tinggi rega tang iya bedau ka nyual.

BAGI 2 

36	Baka pinang dibelah dua.	Sama sigat, sama bajik.	Penyigat enggau pemajik Dom Rommie seduai Endun Marie baka piang ke dibelah dua lebuh seduai ke nikah ba rumah panjai minggu nyin kemari.
37	Buah rian enda tau begulai enggau buah rampu.	Bujang enggau dara enda tau begulai laban ngembuan pengingin ati ke pangan diri.	Bujang enggau dara ditagang begulai enggau pangan diri enti bedau dipaduka jadi melaki bini laban buah rian enda tau begulai enggau buah rampu.
38	Baka pagar makai umai. Ngarapka pagar, pagar ga makai padi.	Orang ke dikarapka nyaga pengelikun utai enggau manah tang iya empu ke ngereja penyalah.	Bala anak kaban kitai di sepiak nya baka pagar makai umai enda ulih dikarapka nyaga utai kita laban sida iya ke nguluka orang nyeruga rumah kitai.
39	Gerah mata undang.	Gaya dipeda mudah diulihka tang lebuh dikereja tusah bendar.	Tuga getah nya dipeda gerah mata undang tang enti dichabut enda ga ulih.
40	Runggu ensing enti terebai apus ga sungai.	Gamal dipeda lembau tang enti iya ngereja pengawa tembu enggau manah.	Rikie dipeda baka ke runggu ensing tang enti terebai apus ga sungai laban iya ngembuan pengeliat ati.
41	Ketup lelabi mati	Kereja bebendar nyentukka utai ke dijuluk ati nya ulih, enda dilengkaka ngapa.	Enti kitai bisi juluk ati kitai mesti ngereja iya baka ketup lelabi mati nyentukka utai nya ulih kitai.
42	Baka tekura enggai enda tepantup di bandir.	Ngereja pengawa nitihka pengelaju diri empu asal meh tembu.	Aku baka tekura enggai enda tepantup di bandir lebuh ke besekula laban enggai ngelebu apai indai.
43	Ari bebini ari betutus, abi gerai bini mati.	Maya nya nguna utai tekalanya deka ngereja iya, udah iya ulih utai nya nadai diguna agi.	Kami serumah mayuh bendar ari bebini ari betutus, abi gerai bini mati lebuh ke ngaga utai tang lebuh utai nya tembu digaga iya nadai diguna orang agi.
44	Enda ulih dirika tali basah, enda ulih dudukka mangkuk belah.	Lebuh bechara, enda ulih diasuh menang meh orang ke tanah salah.	Lebuh mutuska chara pasal berebutka temuda dia penghulu madahka enda ulih didirika tali basah, enda ulih dudukka mangkuk belah ngagai sida sepiak ke tanah alah ba pechara nya.
45	Ukai ngajihka rangkang ngachuk mata.	Ukai dekaka penusah nuntung sapa-sapa.	Lebuh ke bejaku ba rumah orang Tembawai Tinting dia pemesai ari Opis Ngintu Pengelantang Mensia Mayuh madahka iya ukai ngajihka rangkang ngachuk mata enti sema tanah renjan tak tusur ba mua rumah sida laban hari ke belunggur ujan.
46	Udah labuh dipanggung lesung.	Beturut-turut ditinggang penusah.	Kasih bendar sida ari ili rumah kami, udah ga labuh dipanggung lesung laban dua bulan beturut sida kena ampuh bah lalu ditinggang pemati.
47	Buah ilang ilu diempa parai apai dilua parai indai.	Pengawa ke balat nadai ngena, dikereja ngenusah enda digaga pan ngemediska kitai mega.	Pengidup bala samseng balat pedis diatu baka buah ilang ilu diempa parai apai enda diempa parai indai, ngereja penyai dirangkap polis lalu enti enda ngereja nya pan nadai jalai pengidup.
48	Baka mayau ke ngelamun tai.	Orang ke ngelalaika penyai tauka penyalah diri.	Asut baka mayau ke ngelamun tai madahka diri nadai kala enggau orang ngereja penyalah tang orang sampal nemu iya jai.
49	Raung ke beketebung pama bengkak jari, tichak ke beranak engkarung beadi-adi.	Orang ke ngereja pengawa tang kitai ke napi pemedis enggau pengiriuh.	Igat Yum indah enda baka raung ke beketebung engkatak bengkak jari, tichak ke beranak engkarung beadi-adi rindang nyempulang pemesai kin kitu tang orang ke bulih penguntung ari pengawa iya.
50	Mang ari kepayang rendam sepagi, munuh ari ipuh ujung jenggi, nyaing ari puting mata geraji.	Orang ke ngembuan penemu, pemerani tauka pengering ke jauh lebih nyulut ari orang bukai.	Tuai kayau nya endang disemaka orang mang ari kepayang rendam sepagi, munuh ari ipuh ujung jenggi, nyaing ari puting mata geraji nya alai iya endang pemadu dikenakutka munsuh.
51	Muntang ari Limbang semalam rantu jalai, melit ari Kanowit jampat datai.	Deka ngereja pengawa enggau chara muntang tauka beguai tang ngasuh laun agi tembu.	Iya deka muntang ari Limbang semalam rantu jalai, melit ari Kanowit jampat datai lebuh ngereja pengawa tang ngasuh kereja iya laun agi tembu.
52	Buntak pulai buntak.	Pulai puku, nadai alah nadai menang.	Amat manuk sabung aku alah tang aku buntak pulai buntak lebuh ke nyabung rambau gawai tu tadi.
53	Baka ukui engkadah linau.	Ngining pengaya pengeraja orang.	Kitai Iban baka ukui ke nengkadah linau meda pemansang bansa bukai.
54	Buah empelam buah empelit, masam di dalam manis di kulit.	Gamal tauka gaya manah dipeda tang ati iya jai enggau orang.	Aya Sut nya baka buah empelam buah empelit masam di dalam manis di kulit, gaya ke manah dipeda tang ati iya jai.
55	Labah baka buah merunjau ulu, puntau baka menasan jalai jelu. Labah baka buah merunjau ili, puntan baka menasan jalai jani.	Ngereja pengawa tang nadai pengujung, puntan, nadai nyadi sereta lebu ngapa.	Bala kami serumah ke deka ngaga pegung ikan kunsi tak labah baka buah merunjau ulu, puntan baka menasan jalai jelu, labah baka buah merunjau ili, puntan baka menasan jalai jani laban mayuh orang narit diri ngereja pengawa.
56	Rarika rebut tetemuka ujan, rarika sungkup tetemukan pendam.	Nadai ulih nyeliahka diri ari besatup enggau penusah.	Bala penchuri rarika rebut tetemuka ujan, rarika sungkup tetemukan pendam lebuh dipelampatka bala polis lalu disaup mensia mayuh.
57	Rari kulu tama buba, rari kili tama ensenga.	Penusah nadai ulih diseliahka, kin kia dituntung penusah.	Bala penchuri rari kulu tama buba, rari kili tama ensenga lebuh dipelampatka bala polis.
58	Baka sawa ti natka telan.	Gali gadak-gadak natka pengenyang perut udah badu makai.	Aki Supa benung gali garing-garing ba tengah ruai baka sawa ti natka telan.
59	Agi bau lia.	Agi biak, bedau aruh ngemujang tauka ngenaraka diri.	Wat enda ibuh enggau orang ke bujang besun-sun ngerandau sida ke dara laban iya agi bau lia.
60	Laju ari peluru leka senapang, lasit ari sumpit rejang pematang.	Orang ke ngembuan pemereti, pemerani enggau pengering ke jauh lebih agi ari orang bukai.	Tuai kayau nya ending disemaka orang laju ari peluru leka senapang, lasit ari sumpit rejang pematang nya alai munsuh endang ngeri endar ke iya.
61	Agi bekulit agi bedaki.	Asal kitai rajin bekereja kitai agi bulih utai.	Amat pan gaji aku enda besai tang aku agi bekulit agi ga bedaki.
62	Betunggang lupung.	Beambis-ambis duit ringgit enggau reta tengkira dikena nyengulaka bala anak.	Kami duai melaki bini betunggang lupung nyengulaka bala anak awakka sida mujur dalam pelajar.
63	Ngetu baka puyu mabuk keruh, ngenung baka empelekung mabuk ambuh.	Temati kutu, enda nemu nama bagi utai ke patut dikereja tekala nya.	Bala kami tak ngetu baka puyu mabuk keruh, ngenung baka empelekung mabuk ambuh lebuh ninga pemanah jaku ke dipansutka Kepala Menteri.
64	Sumpah empitu enggau chuik.	Sebarang sapa ke dulu ngelanggar danji iya nya meh dulu kena tinggang penusah.	Enti kitai enggai kena sumpah empitu enggau chuik kitai anang nguji ngelanggar danji enggaika tulah.
65	Baka kemarau munsang.	Lebuh siang mata deka tinduk tang lebuh malam mata enggai ngantuk.	Anak mit nya baka kemarau munsang, buntau bendar apai indai ngibun iya.
66	Baka tapang diwan rembia, baka lubuk diwan baya.	Indu dara tauka orang bujang ke udah bisi orang ngempu.	Endat diatu baka tapang diwan rembia, baka lubuk diwan baya sekumbang iya ke udah ditunang bujang sida ari Lubuk Empit.
67	Udah aruk dipukung alung	Udah ga jai gamal tambah enggau penyai ulah.	Bujang jelar nya udah ga aruk dipukung along lalu enda nemu ngubah ulah diri.
68	Baka empeliau bedua iku.	Gawa ke orang bukai rajin tang gawa ke diri empu lembau.	Indai Ina baka empeliau bedua iku lebuh ngereja pengawa di rumah panjai.
69	Makai pala bangah.	Rajin gawa ke orang tang lembau ngereja pengawa diri.	Ini Mina makai pala bangah lebuh ngereja pengawa di rumah panjai.
70	Kapal pechah yu kenyang.	Kitai ke kiruh ngereja pengawa tang orang bukai ke bempu penguntung.	Menua kami disemaka baka kapal pechah yu kenyang, taja pan projek pemansang mayuh di buka tang orang bukai ke bulih penguntung.
71	Ngarapka bubu pesuk.	Ngarapka pengawa ke dikereja meri penguntung tang nadai ngenataika asil.	Sida ngarapka bubu pesuk lebuh ke bekebun lada laban lada sida lalu bedau mansutka asil.
72	Bepantuk diri sekerungan.	Jadi melaki bini enggau diri serumah.	Bala bujang dara sida di Tungku Tiga mayuh bendar bepantuk enggau diri sekerungan.
73	Baka asam gulai garam.	Orang ke tau begulai, enda belaya.	Lamba seduai Isun endang baka asam enggau garam kenyau ari mit menya.
74	Munyi burung ke makai buah kara.	Richah, ragak, inggar.	Lebuh pengajar nadai dalam kelas bala nembiak munyi burung ke makai buah kara.
75	Merau sama tau, naik sama landik.	Sama nemu sereta landik ngereja pengawa.	Kami serumah sampal merau sama tau naik sama landik lebuh betukang ngaga rumah.

BAGI 3

76	Kair pantuk.	Utai ke ulih sari semina chukup diempa sari nya aja.	Sida Anam sebilik semina kair pantuk ngidupka diri.
77	Nanam tubai langkung.	Deka digumak, deka dilangkung.	Bujang Sigat ka amat nanam tubai langkung ke lebih agi lebuh orang muji iya ba mua bala mayuh.
78	Betumbuk dan kandis.	Siku lelaki enggau siku indu diri menyadi ari sepiak jadi enggau siku indu siku lelaki diri menyadi ari sepiak mega.	Dong seduai adi indu iya Mary ari Sungai Bekut betumbuk dan kandis enggau Lina seduai adi iya Sami ari Tinting kakang.
79	Turun mata benih.	Dua iku lelaki diri menyadi jadi enggau dua iku indu diri menyadi ari sepiak mega.	Tony seduai adi iya Terry ari Munggu Sepan turun mata benih enggau Alice seduai adi iya Lisa ari Sungai Aping.
80	Kurus keretum	Jarang nani, nguan tauka tinduk ba peninduk diri	Bujang kami serumah siku nya endang selalu disemaka orang kurus keretum laban iya ti selalu bejegau ngagai rumah bukai tiap-tiap malam.
81	Kemaya ingkat kala ke laut	Nadai utai dikenau, nadai pengelandik laban enda kala ngereja	Igat tau enda ibuh diasuh nyanggit jala nya, kemaya ingkat kala ke laut.
82	Apin kijang merauk apin ga rangkang patah.	Apin kitai datai ba endur orang ke digusung apin ga utai nyadi dia.	Penemuai aku ngagai rumah sida apai Sigat salah ulu, apin kijang merauk apin ga rangkang patah.
83	Ati hari.	Jampat berubah ati, sekejap manah udah nya lalu bebali jai.	Bakih aku nya selalu bendar ati hari, sekejap ati iya manah tang jampat bendar ga iya begedika orang.
84	Abis di tanah abis di rumah.	Bumai tang enda bulih padi, penyuntuk nadai padi.	Kami sebilik suntuk bendar taun tu, tak abis di rumah abis di tanah.
85	Antu berumah baruh dagu.	Jaku tauka penemu ke dipansuka kitai enda bejimat tauka ukai ari pansik dulu tau mai penusah ngagai kitai ke mansutka iya.	Kitai mesti bejimat mansutka jaku laban nunda ku jaku tuai, antu berumah baruh dagu.
86	Amau di puchuk tuga.	Enda tegap, enda entap.	Sida Aruk sebilik enda tentu entap pendiau sekumbang ke udah nampung kami serumah, baka amau di puchuk tuga.
87	Au belau.	Mulut ngau tauka nyanggup ngapa tang tulang enda ngereja.	Igat tak semina au belau lebuh orang mai iya beduruk ngereja pengawa tang iya nadai kala datai.
88	Anak nganti indai pulai turun.	Nganti enggau ati ke lelengau, sinu sereta merampau.	Endun baka anak ke nganti indai pulai turun lebuh nganti pemulai ambai iya ke pegi ke Brunei.
89	Aum juak.	Dua mua tauka dua ati lalu bulih penguntung ari sepiak-sepiak.	Bakih aku nya enda tau diambi nyadi ke saksi kitai ba pechara ke dudi ila laban iya udah ditemu aum juak.
90	Angat tai manuk.	Rajin sekejap aja lalu jampat mantul tauka leju ngereja pengawa.	Adi aku ke biak tak angat tai manuk besekula, terubah nurun rajin bendar tang seminggu udah nya lalu enggai besekula agi.
91	Aruk-aruk burit kali, pagila lusa dudi hari.	Deka malas uti, tundi, keduan, laya sebarang maya dudi hari.	Laban nuan udah balat bendar beduan aku, nya alai aruk-aruk burit kali, pagila lusa dudi hari aku mesti malas keduan nuan nya.
92	Asai ke diau di baruh punggu.	Selalu ngembuan pengirau ati enggaika ditinggang penusah tauka pemedis.	Kami serumah seruran asai ke diau di baruh punggu sekumbang ke dituntung penusah tanah runtuh muak ari ujung bilik rumah kami.
93	Apin burung terebai, apin ga rangkang patah.	Maya nya kitai datai tauka pulai ari rumah orang tekala nya ga penusah nyadi dia.	Kami serumah bisi bendar sangka ati ke temuai ke datai ngagai rumah kami kemari bisi ngenchuri utai kami ke lenyau kemari laban apin burung terebai, apin ga rangkang patah.
94	Arapka bubu pesuk.	Ngarap ngapa tang utai ke dikarapka nya enda ulih.	Aku arap bendar ke anak aku ke bekuli di nengeri ngelamatu bisi bulih belanja tang lebuh iya ke nemuai ke rumah apin lama ke udah tak semina chukup ke tambang iya pulai mansang aja duit iya.
95	Anchah gagaka periuk tanah.	Kelalu begaut madahka pengaga ati diri tang nya tau ngujungka bulih penusah sereta asa ngapa.	Dom enda patut kelalu gaga ninga diri ke deka pindah gawa ngagai endur bukai enggaika baka Anchah gagaka periuk tanah, meda periuk pechah iya lalu nyabak.
96	Asai ke megai telu.	Ngembuan pengerawan tauka penakut enggaika bulih penusah.	Kami sebilik rawan bendar ati sekumbang ke ngibun orang tuai sakit, asai ke megai telu.
97	Asap lia seduai endang segulai.	Nasit seduai kedeka jadi melaki bini endang udah serasi.	Ujang seduai Endat ke bepangan ngelamatu enda tebuaika pangan diri laban asap lia seduai endang segulai.
98	Belah rutan.	Enda talahka pangan laban sama-sama kering, gagah sereta berani.	Lebuh ke bibat lengan dia Akat seduai Abun belah rutan laban seduai bela kering.
99	Buah ilang ilu, diempa parai indai enda diempa parai apai.	Penusah tauka penyalah ke edna ulih diseliahka. Dikereja salah enda dikereja pan salah mega.	Sinu bendar aku ninga rita bakih aku ke ditinggang penusah ke enda ulih diseliahka iya, baka ke udak teempaka buah ilang ilu, diempa parai indai, enda diempa parai apai.
100	Buyah ngereja api, manuk ngereja taji.	Ngembuan ati ke sengaja deka ngereja pengawa ke tau ngemedis tauka ngenusah diri.	Orang ke ngenchuri endang baka buyah ngereja api, manuk ngereja taji laban polis endang selalu beratika sida ke ngereja penyalah.
101	Berani nebang berani nyan.	Ati sengaja deka ngereja utai lalu enti bisi penusah tauka penyalah iya patut berani mega tanggung.	Nuan enda ibuh nagang aku ngereja pengawa nya laban aku berani nebang berani ga nyan iya.
102	Bingkuk batang empasa, lurus ulu lungga.	Enda tentu lurus ati lalu enda mega kelalu jai.	Perasa bendar aku laban kaban aku nya ngumbai iya manah bendar ngelamatu tang diatu baru aku nemu iya nya bingkuk batang empasa, lurus ulu lungga.
103	Baka pendiau antu bubut.	Diau nyembuah kediri, enda betampung rumah enggau orang.	Pendiau sida Arit sebilik baka pendiau antu bubut laban sida ke kelalu bingking ati enggai betampung enggau sida serumah.
104	Berumahka ati orang.	Nyerangkung ati enggau penemu orang bukai ari belakang. Melakangka orang ke nadai datai lebuh mutuska penemu.	Lebuh ke baum malam nya dia bala mayuh bedau ngasuh tuai rumah mutuska aum laban sekeda tuai bilik enda ulih datai baum laban kitai enda tau berumahka ati orang.
105	Baka ke meda balak mentua.	Nemu tauka meda utai nya salah tang enggai nyadi ngerara laban takutka utai nya ngenusah tauka ngemedis diri.	Lapa nuan enda nulung pangan nuan nya deh Igat? Nuan tak baka ke meda balak mentua semina ngemataka iya aja.
106	Batang enda telanggarka tuga.	Anak enda telabanka apai indai, nembiak enda telabanka pengajar, orang biak enda telabanka orang tuai, orang tampil enda telabanka orang asal.	Amat pan kitai ke nembiak bisi pemandai ba pelajar sekula tang kitai enda telabanka apai indai kitai ba penemu tuai laban batang enda telanggarka tuga.
107	Baka Beketan.	Udah diberi orang makai lalu angkat beguai-guai tauka berumban angkat.	Sida sebuat tak baka Beketan, udah badu makai lalu enda tepadahka diri angkat laban beguai ketegal endur ke digusung agi jauh.
108	Belakang bungkuk diasuh ngema pintu, lengan singkung diasuh nyan alu.	Orang ke nadai tauka kurang penemu diasuh tauka dipaduka mangku pengawa.	Aku ukai enggai diasuh kita bejaku ngarika kitai serumah lebuh penemuai menteri ngagai rumah kitai ila tang laban aku ngasaika belakang diri bingkuk diasuh ngema pintu, lengan singkung diasuh nyan alu.
109	Baka baya ke ditegah indu.	Abis ati, abis runding sereta nadai temu tunga laban ti kelalu kesal.	Bala orang ke nyabung enda belisin baka baya ke ditegah indu lebuh kelang sabung sida diserebu polis.
110	Baka manang ke nangkap semengat.	Beguai, jampat, lanchat, sikar.	Kasih bendar aku meda bakih aku balut semut lebuh ke niki buah engkala nyau baka manang ke nangkap semengat jari iya nipas semut.
111	Baka ke ngelakuka tajau belah.	Mar deka belaki bebini.	Apai indai Dom baka ke ngelakuka tajau belah nanya indu ke bini Dom ngelamatu tang lalu ga bedau bisi orang dekaka iya.
112	Buruk jerami.	Anak itit mati buruk burit laban mechah maya buruk jerami udah badu ngetau.	Seraban anak itit kami sepuluh iku tak buruk jerami magang dalam kerungan ba langkau umai kami din.
113	Baka rutan tampung danan, baka ijuk tampung penduk, baka wi tampung tali.	Parai orang ke tuai lalu ditampung orang ke rebak dudi.	Kitai ke rebak diatu nampung adat orang ke tuai baka rutan tampung danan, baka ijuk tampung penduk, baka wi tampung tali.
114	Begantung randu.	Dikena madahka perut diri lapar.	Nyau begantung randu aku diatu laban hari udah jauh ngalih.
115	Begantung senduk.	Maya lapar pungkang, nadai padi, nadai beras.	Sebulan tu kami menyanak begantung senduk laban padi ke ulih taun nyin kemari udah abis lalu padi taun tu pan bedau tau diketau.
116	Baka batu tungku.	Nelap sereta nadai mayuh jaku.	Endun selalu dipuji sida sebilik laban perangai iya baka batu tungku.
117	Baka mulung, peneka ati ngaga, dilinut tau, ditumpi tau.	Peneka ati ngasuh, peneka ati ngaga sereta nadai muai jaku orang.	Bakih aku nya nyamai amat diputarka, baka mulung, peneka ati ngaga, dilinut tau ditumpi pan tau.
118	Baka telu ba tapa, enti dipichit tentu belah.	Di baruh kuasa orang, sebarang maya orang tau nganu tauka ngemedis kitai.	Orang kuli nya sebarang ku pengaji iya merintah baka telu ba tapa, enti dipichit tentu belah.
119	Baru ngiku pipit.	Dikena madahka penumbuh padi, daun iya baru nyumbuk ngiku pipit.	Penumbuh padi kami di umai din baru ngiku pipit dipeda aku lebuh ke ngabas umai kemari.
120	Baru betentang dan.	Dikena madahka penumbuh padi ke baru tengan mansang.	Apai aku madahka padi kami di umai din baru betentang dan laban iya bisi ngabas umai kemari.
121	Baru ngijap bubu.	Padi baru ngandung.	Indai madahka padi kami di umai din baru ngijap bubu.
122	Baru entachau.	Padi ngabas murai.	Rindu bendar meda belayan padi kami di umai din baru entachau diatu.
123	Baru tau dipangka labu.	Padi baru deka mansau.	Enda kami sebilik lama agi begantung senduk laban padi di umai din baru tau dipangka labu.
124	Baka engkudu mayuh mata.	Mayuh orang dikedeka tauka dikingin ati.	Bujang nya enda tentu dikerindu bala sida ke dara di menua nya laban iya baka engkudu mayuh mata.
125	Bengkak jari.	Bepentika bini ke benung ngandung lalu enda tau peneka ati ngaga sebarang utai enggaika anak ada menawa.	Ujang benung bengkak jari nya alai iya enda enggau kitai beduruk nebuk tiang kemari.